1364. April 23. Czarnowanz

In Nomine Domini Amen. Ad rei sempiternam memoriam. Noverint universi presentes et posteri, quorum audiencie presens singraphus fuerit recitatus, Quod nos Johannes divina miseracione prepositus monasterii Domus dei ordinis Premonstratensis Wrat. dioc. ex assercione veridica et testificacione devotarum, Margarethe priorisse, Broncze supriorisse, Agnetis circatricis, Clare celarie, Bogusze cantricis tociusque conventus sororum dicti monasterii Domus dei, Plenius cognoscentes Jacobum de Zuzella villa nostri monasterii incorporata Scultetum dilectum nobis et fidelem, Tabernam in dicta villa nostra ad prefatum nostrum monasterium ab olim pertinentem apud Venerabilem virum Prothiuum felicis memorie nostri prius dicti monasterii prepositum predecessorem nostrum, emisse cum prato quodam legitime, ac persolvisse eidem domino Prothiuo totaliter in parato libere et perpetuo per se et suos succedentes legitimos possidendam et in usus sibi placitos convertendam, Peticionibus sepe dicti conventus nostri serviciisque prius dicti Jacobi Sculteti nostri fidelibus nobis multipliciter exhibitis et deinceps faciendis benigne inclinati, redditus nichilominus sepedicti monasterii nostri augere studiose intenti, prefatam antedicte taberne empcionem huiusmodi ratificamus presentibus approbantes, tali tamen pacto quod sepedictus Jacobus et sui successores legitimi octo Scottos (al. Schockos) grossorum Pragensium de prenotata taberna, cui aream in monticulo prope curiam nostram assignamus, nobis ac nostro monasterio sepissime dicto, racione census annui solvere in festo sancti Georgii martiris perpetuo tenebuntur. In cuius rei testimonium presens scriptum fieri mandavimus sigillorum nostrorum appensione roborantes. Datum per manus Nicolai de Delnicia plebani in Domo dei supradicta in die sancti Adalberti, Anno domini m° ccc° lx° quarto, Presentibus hiis testibus, dominis Stinkone questore, Alberto, Valentino confratribus nostris, Johanne de Brozecz plebano et multis aliis fide dignis.

Nach alten Abschriften, da das Original verloren ist.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.